23 — 26 траўня ў Варшаве ў Палацы Культуры і Навукі пройдзе міжнародны кніжны кірмаш, у межах якога будзе працаваць і стэнд незалежных беларускіх выдаўцоў «Вольная Беларусь» (stoisko nr 138 w Sali Marmurowej, PKiN).
Вось расклад мерапрыемстваў.
24.05, пятніца
Час: 12.00 — 12.50
Месца: заля імя Мікалайскай, Палац культуры і навукі, Варшава.
Тэма: Беларуская літаратура ў польскіх перакладах (арганізатар мерапрыемства Інстытут беларускай кнігі; на польскай мове з беларускім перакладам).
Цягам апошніх дзесяцігоддзяў польскія выдаўцы спрабуюць «раскруціць» беларускую літаратуру на хвалі ўзмацнення палітычнай актыўнасці напярэдадні і адразу пасля прэзідэнцкіх выбараў у Беларусі. На жаль, у інфармацыйным зацішшы, якое звычайна пануе у перыяд паміж выбарамі, выдаўнічы запал паступова згасае. Прыцягнуць, а потым утрымаць увагу чытачоў і выдаўцоў — задача не з простых, да таго ж дадаецца праблема, звязаная з пошукам добрага перакладчыка з беларускай на польскую мову. У такой сітуацыі беларуская літаратура застаецца для большасці чытачоў і выдаўцоў у Польшчы практычна невядомай. Ці і якія меры прымаюцца дзеля таго, каб змяніць існуючую сітуацыю, і што беларуская літаратура можа прапанаваць польскаму чытачу — пра гэта пагаворым падчас сустрэчы.
У сустрэчы возьмуць удзел:
- Наталля Русецкая — беларусістка, перакладчыца, ад’юнкт на кафедры славянскага літаратуразнаўства Універсітэта Марыі Складоўскай-Кюры;
- Яраслаў Іванюк — выдавец, журналіст, заснавальнік таварыства «Камунікат»;
- Катажына Дрозд-Урбаньска — беларусістка, ад’юнкт на кафедры беларусістыкі Варшаўскага Універсітэта.
25.05, субота
Час: 15.00 — 15.50
Месца: заля імя Мікалайскай, Палац культуры і навукі, Варшава
Тэма: Алесь Бяляцкі: Нобелеўскі лаўрэат і палітычны вязень
Арганізатар мерапрыемства праваабарончы цэнтр «Вясна»; на беларускай мове з польскім перакладам.
Алесь Бяляцкі — беларускі грамадскі дзеяч, праваабаронца, пісьменнік, заснавальнік праваабарончага цэнтра «Вясна», палітвязень. Разам з калегамі кіраўнік «Вясны» быў затрыманы 14 ліпеня 2021 года падчас адной з найбольш масіраваных атак рэжыму на грамадзянскі сектар і незалежныя медыя.
7 кастрычніка 2022 года Алесь Бяляцкі быў абвешчаны лаўрэатам Нобелеўскай прэміі міру. На той час і да сённяшняга дня ён знаходзіцца за кратамі.
У 2023 годзе беларускі суд па надуманных абвінавачваннях прысудзіў Алесю Бяляцкаму 10 гадоў калоніі ўзмоцненага рэжыму і вялікі штраф.
Падчас сустрэчы пагаворым пра:
- cтудэнцкія гады Алеся Бяляцкага;
- заснаванне цэнтра «Вясна»;
- крымінальны пераслед Алеся Бяляцкага з боку рэжыму;
- літаратуру ў жыцці Алеся Бяляцкага;
- турэмнае зняволенне Нобелеўскага лаўрэата.
