![](https://zbsb.info/wp-content/uploads/2024/07/d2b5ca33bd970f64-116-1024x576.png)
6 ліпеня ў Вільні адышоў у лепшы сьвет Віталь Каракорскі, літоўскі, габрэйскі і беларускі грамадзкі дзяяч, журналіст і пісьменьнік. Пра сьмерць Віталя паведаміў у фэйсбуку ягоны сын Даніэль.
Віталь Каракорскі нарадзіўся 2 студзеня 1958 году ў Бабруйску. Сваім дзіцячым і юнацкім гадам прысьвяціў тры эсэ, якія зачытваў у адмысловых перадачах беларускай службы Радыё Свабода: «Бабруйск. 1960-я. Эсэ пра дзяцінства», «Біржа эмігрантаў», «Бабруйская багема».
![](https://zbsb.info/wp-content/uploads/2024/07/d2b5ca33bd970f64-119.png)
Не аднойчы выступаў на хвалях нашага радыё як экспэрт у справах пашырэньня NATO на ўсход, ізраільска-палестынскага канфлікту, суду над камунізмам, галакосту ў Беларусі — «Ці адказныя беларусы за галакост?» ды іншых.
Віталь вызначаўся дасьведчанасьцю ва ўзьнятых тэмах і канцэптуальным поглядам на іх.
Віталь Каракорскі браў удзел ува ўсіх беларускіх мэдыйных праектах у Літве, спрычыняўся да беларускай грамадзкай дзейнасьці, быў сябрам Саюзу беларускіх пісьменьнікаў.