4 сакавіка мэр італьянскай Балёньні Матэо Лепорэ прысвоіў ганаровае грамадзянства горада беларускай дэмакратычнай лідэрцы Сьвятлане Ціханоўскай.
Урачыстая цырымонія прайшла 4 сакавіка ў залі гарадзкой рады. Рашэньне аб прысваеньні Сьвятлане Ціханоўскай званьня ганаровай грамадзянкі гарадзкая рада Балёньні аднагалосна ўхваліла 18 сьнежня 2023 году.
Ганаровае грамадзянства «гэта ня проста сымбалічны жэст, але канкрэтны знак блізкасьці да яе барацьбы і барацьбы беларускага народа», заявіла старшыня гарадзкой рады Балёньні Марыя Катэрына Манка, піша італьянская прэса.
«Гэты жэст нясе сабой важнае пасланьне салідарнасьці для ўсяго беларускага народу, які змагаецца супраць дыктатуры. Італія і Балёньня змагаюцца за каштоўнасьці і прынцыпы, на якіх заснавана ваша краіна і за якія людзі ў Беларусі ахвяруюць жыццём і свабодай», — сказала ў адказ Ціханоўская.
Сьвятлана Ціханоўская з 3 сакавіка знаходзіцца зь візытам у Італіі. У праграме яе візыту паездкі ў Флярэнцыю, Балёньню і Мілян, сустрэчы з мэрамі гэтых гарадоў. Падчас іх Ціханоўская, сярод іншага, плянуе абмеркаваць магчымасьць выдзяленьня памяшканьня для арганізацыі беларускага шэлтэру. У Міляне яна наведае выставу, прысьвечаную беларускім палітвязьням.
Чакаецца, што 6 сакавіка ў Рыме Ціханоўская выступіць з прамовай на другой сустрэчы альянсу парлямэнцкіх груп «За дэмакратычную Беларусь», у якой прымуць удзел прадстаўнікі 20 парлямэнтаў розных краін, беларускія экспэрты і праваабаронцы, сябры Каардынацыйнай рады, беларускіх палітычных партыяў і «народных амбасадаў». Падчас сустрэч Ціханоўская плянуе узьняць пытаньні вызваленьня палітвязьняў, візавай падтрымкі беларусаў, захаваньня іх мабільнасьці і пытаньні іх легалізацыі ў Італіі, а таксама прыцягненьне да адказнасьці прадстаўнікоў рэжыму Лукашэнкі «за злачынствы супраць правоў чалавека і ўдзел у ваенных дзеяньнях ва Ўкраіне».
- Да выбараў прэзыдэнта Беларусі 2020 году Сьвятлана Ціханоўская была перакладчыцай, але падзеі таго году радыкальна зьмянілі яе жыцьцё. Яна зарэгістравала сваю кандыдатуру на прэзыдэнцкіх выбарах пасьля таго, як яе мужа, прадпрымальніка і блогера Сяргея Ціханоўскага, да іх не дапусьцілі.
- Сяргей Ціханоўскі асуджаны на 18 гадоў пазбаўленьня волі. У лютым 2024 году яму дадалі яшчэ 1,5 года ў справе аб «непадпарадкаваньні патрабаваньням адміністрацыі калёніі» (ч. 2 арт. 411). Амаль 2 гады Сяргей Ціханоўскі знаходзіцца ў рэжыме інкамунікада — без аніякай сувязі з вонкавым сьветам.
- Пасьля прэзыдэнцкіх выбараў 2020 году, пераможцам назвалі Аляксандра Лукашэнку, нягледзячы на шматлікія паведамленьні пра фальсыфікацыі на ўсіх узроўнях, пачаліся самыя масавыя ў гісторыі Беларусі пратэсты, якія суправаджаліся беспрэцэдэнтным узроўнем гвалту сілавікоў супраць удзельнікаў пратэстаў.
- Ціханоўская пад ціскам беларускіх уладаў вымушана выехала ў Літву і стала лідэркай беларускай апазыцыі ў выгнаньні.
- У сакавіку 2023 году Ціханоўскай завочна прысудзілі ў Менску 15 гадоў пазбаўленьня волі па цэлым шэрагу цяжкіх артыкулаў, уключаючы дзяржаўную здраду.
- За сваю палітычную дзейнасьць Ціханоўская двойчы была намінаваная на Нобэлеўскую прэмію міру (у 2021 і 2022 гадах). Як лідэрка беларускага дэмакратычнага руху Ціханоўская атрымала прэмію Сахарава «За свабоду думкі» Эўрапейскага парлямэнту 2020 году, а таксама — разам з Марый Калесьнікавай і Веранікай Цапкалай — прэмію Карла Вялікага ў 2022 годзе. Амэрыканскі Нацыянальны фонд падтрымкі дэмакратыі (NED) узнагародзіў Ціханоўскую мэдалём «За заслугі перад дэмакратыяй».
