Беларуская Рада культуры абвяшчае набор на вакансіі выкладчыкаў(-ц) адукацыйнай праграмы ў межах міжнароднага праекту «ArtPower Belarus: захаванне грамадзянскай прасторы Беларусі праз культуру і мастацтва».
Арыентацыйная дата пачатку працы: красавік 2024 года.
Тып кантракту: частковая занятасць (колькасць гадзінаў будзе залежаць ад курсу).
Месца працы: онлайн.
Агляд пазіцыяў
З 1 лютага 2024 года ArtPower Belarus рэалізуе адукацыйны праект, асноўная мэта якога — паглыбіць веды беларускіх прафесіяналаў ад культуры ў кіраванні і маркетынгу творчай галіны як эканамічнай дзейнасці.
ArtPower Belarus шукае дынамічных і дасведчаных выкладчыкаў і выкладчыц, якія будуць адказваць за правядзенне онлайн-лекцыяў, семінараў і практыкумаў у красавіку — чэрвені 2024 года.
Асноўныя абавязкі:
- Распрацоўваць і праводзіць лекцыі, семінары і майстар-класы на тэмы: «Уводзіны ў арт-менеджмент», «Уводзіны ў праектны менеджмент», «Камунікацыі і маркетынг у сектары культуры», «Фінансавы менеджмент. Фандрэйзінг і кіраванне рэсурсамі», «Капіталізацыя культуры і мастацтва», «Рэгіянальная палітыка, якая ўплывае на кіраванне культураю», «Распрацоўванне праектаў і напісанне праектных заявак».
- Распрацоўваць навучальную праграму (і падбіраць адпаведныя матэрыялы для самастойнага вывучэння).
- Ствараць інклюзіўнае і інтэрактыўнае асяроддзе для навучання.
- Забяспечваць канструктыўнаю зваротнаю сувязь і падтрымліваць удзельнікаў.
Неабходная кваліфікацыя і досвед:
- Прафесійны досвед у названых вышэй галінах / тэмах.
- Досвед выкладання і распрацоўвання навучальных праграмаў будзе перавагаю.
- Моцныя навыкі міжасобаснай камунікацыі, здольнасць прыцягваць і матываваць удзельнікаў.
- Выдатныя арганізатарскія здольнасці.
- Прыхільнасць да спрыяння разнастайнасці, роўнасці і інклюзіі ў класе.
- Асабістая зацікаўленасць сучаснымі тэндэнцыямі, практыкамі і даследаваннямі ў галіне арт-менеджменту і ўменне выкарыстоўваць адпаведную інфармацыю ў навучальнай практыцы.
Працэс падачы заяўкі:
Калі ласка, дашліце заяўку (CV і кароткі суправаджальны ліст пра зацікаўленасць) у электронную пошту: education@byculture.org.
Дэдлайн: 6 сакавіка 2024 года.
Разгляд заявак пачнецца неадкладна і працягнецца да запаўнення вакансіяў.
Толькі кандыдатаў, якія ўвойдуць у кароткі спіс, запросяць на сумоўе.
