Музей Сцяны «Дом на Чэкпойнце Чарлі» папоўніўся выставай пра беларускіх палітвязынак. Афіцыйнае адкрыццё яшчэ плануецца, але ўжо ёсць першыя водгукі ад наведвальнікаў.
![](https://zbsb.info/wp-content/uploads/2024/05/8cbac5c0e729dbbd-1024x683.png)
Журналістка Яўгенія Доўгая (праект «Палітвязынка») распавяла budzma.org, што выстава ў Берліне паўстала дзякуючы ініцыятыве арт-куратаркі з Украіны, якая звязалася з ёю ў студзені.
Што паказваюць на выставе
За некалькі месяцаў для выставы ўдалося сабраць калекцыю турэмных рэчаў. Сярод іх — белая сукенка, у якой адна з палітвязынак узяла шлюб у касцёле, а затым пайшла на суд, дзе ёй вынеслі абвінаваўчы прысуд. Іншая палітвязынка прадаставіла рукавіцы, якія сагравалі ёй рукі ў калоніі, пакуль яна прыбірала снег. Таксама ў экспазіцыі ёсць асабістыя дзённікі палітвязынак і лісты ім ад блізкіх, у тым ліку ад дзяцей.
![](https://zbsb.info/wp-content/uploads/2024/05/1a5f3d19c507b43b-1024x683.png)
![](https://zbsb.info/wp-content/uploads/2024/05/28cf26c1ef86ba9b-1024x683.png)
«У музеі гэта цяпер адна з асноўных экспазіцый, якая будзе пастаяннай. Адно з 50 памяшканняў так і называецца — «Беларусь». Музей Сцяны вялікі і ў ім не толькі пра Нямеччыну і пасляваенную гісторыю Берліна. Шмат экспазіцый прысвечана ахвярам дыктатарскіх рэжымаў, напрыклад, Паўночнай Карэі. Выстава пра беларускіх палітвязынак знаходзіцца побач з экспазіцыяй пра Украіну, дзе ёсць экспанаты, у тым ліку, з Бучы», — распавяла budzma.org Яўгенія Доўгая.
![](https://zbsb.info/wp-content/uploads/2024/05/be3da0e855d5a952-1024x683.png)
Асноўная мэта экспазіцыі пра беларускіх палітвязынак — інфармаванне замежнікаў пра тое, што з сябе ўяўляе Беларусь пад дыктатурай.
![](https://zbsb.info/wp-content/uploads/2024/05/e51c2836a59738eb-1024x683.png)
«Мы хацелі, каб маладыя людзі, якія наведаюць гэтую выставу, зразумелі, што такое дыктатура і якія наступствы яна нясе для краіны. Чула водгукі ад адных з першых наведвальнікаў: выстава вельмі кранальная, асабліва людзям уразаюцца ў памяць рэчы з турмы, напрыклад, сукенка з калоніі», — адзначыла Яўгенія Доўгая.
Выстава ўжо працуе з красавіка (адрас — Friedrichstraße 43-45, 10969 Berlin), але Музей Сцяны яшчэ выбірае дату афіцыйнага адкрыцця.
![](https://zbsb.info/wp-content/uploads/2024/05/161676b24891cff0-1024x683.png)
![](https://zbsb.info/wp-content/uploads/2024/05/3ef3fa6f7c48f2e7-1024x683.png)
З гісторыі Музея Сцяны
Сам музей мае цікавую і багатую гісторыю, якая пачалася ў 1962-м, праз год пасля будаўніцтва ўладамі ГДР сцяны паміж усходнім і заходнім Берлінам. Публіцыст і гісторык Райнэр Хільдэбрант заснаваў у кватэры, якая знаходзілася каля кантрольна-прапускнога пункта «Чарлі», экспазіцыю, прысвечаную ўцёкам людзей з усходняй часткі горада.
![](https://zbsb.info/wp-content/uploads/2024/05/d2a2e89f771b0f00-1024x683.png)
Вядомасці музея спрыяла тое, што ён знаходзіўся ў апошнім доме перад мяжою, у якім віталі і дапамагалі бежанцам з ГДР. Райнэр Хільдэбрант быў таксама заснавальнікам групы, якая дапамагала жыхарам Усходняй Нямеччыны ўцякаць.
Праз невялікае акенца ў старым будынку ХІХ стагоддзя можна было назіраць за ўсімі перамяшчэннямі на мяжы. Між іншым, «Чэкпойнт Чарлі» з’яўляўся тым памежным пунктам, дзе таксама праводзілі абмены шпіёнамі паміж СССР і заходнімі краінамі.
З часам адзін з музеяў, прысвечаных Берлінскай сцяне, разросся на астатнія пакоі шматкватэрнага дома. Іх прысвяцілі барацьбе з тыраніямі па ўсім свеце.
Антон Навумчык, budzma.org,
фота: Аляксандр Шэлегаў
![](https://zbsb.info/wp-content/uploads/2024/05/cd1ca096ad7ef6fc-1024x683.png)
![](https://zbsb.info/wp-content/uploads/2024/05/1f0a621cb8c27688-1024x683.png)
![](https://zbsb.info/wp-content/uploads/2024/05/4790ccfa28886ed2-1024x683.png)
![](https://zbsb.info/wp-content/uploads/2024/05/99c94f78f0e583d5-1024x683.png)