![](https://zbsb.info/wp-content/uploads/2024/07/d2b5ca33bd970f64-336.png)
Фестываль беларускай фатаграфіі PhotoArtDoc адкрывае прыём заявак на конкурс праектаў ад фатографаў і мастакоў, якія працуюць з фатаграфіяй. Тэма адкрытага конкурсу 2024 года — «Сваё месца».
Да ўдзелу ў конкурсе запрашаюцца аўтары з усяго свету.
«На працягу ўсёй гісторыі чалавецтва перамяшчэнне людзей было неад’емнай часткай цывілізацыі. Будзь то вымушанае перасяленне з-за канфліктаў і катастроф ці добраахвотнае імкненне да новага пачатку, — змена месца жыхарства непазбежна ўплывае на нашу ідэнтычнасць і самаўспрыманне. А часам, нават застаючыся на месцы фізічна, мы можам адчуваць сябе чужымі, губляючы пачуццё прыналежнасці. У сучасным свеце гэтая тэма асабліва актуальная, у святле пытанняў ідэнтычнасці і самавызначэння. І пошуку свайго месца ў розных маштабах — ад круга сям’і і лакальнай супольнасці да больш глабальных узроўняў сацыуму і свету», — адзначаюць арганізатары.
PhotoArtDoc запрашае фатографаў і мастакоў, якія працуюць з фатаграфіяй, узяць удзел у конкурсе фатаграфічных праектаў, якія адлюстроўваюць прапанаваную тэму. Поле для інтэрпрэтацый і аўтарскага выказвання — вельмі шырокае. «Сваё месца» — уключае ўсе ўзроўні, ад фізічнай прасторы і сацыяльнага асяроддзя, да ўнутранага адчування сябе ў свеце.
Асновай візуальнага зместу праекта павінна быць фатаграфія (фотаздымкі). Пры гэтым аўтары могуць выкарыстоўваць мантаж, калаж, мульціэкспазіцыю і іншыя метады пераўтварэння выяў. У суправаджальным тэксце аўтару неабходна будзе апісаць працэсы і метады, якія выкарыстоўваліся пры стварэнні праекта.
Пераможцаў вызначыць кампетэнтнае міжнароднае журы.
На першым этапе журы сфарміруе шорт-ліст да 10 фотапраектаў.
З праектаў, якія ўвайшлі ў шорт-ліст, будуць вызначаны пераможцы з размеркаваннем па месцах 1, 2 і 3.
Што атрымаюць пераможцы?
— фотапраект пераможцы (1 месца ў адкрытай намінацыі) будзе прадстаўлены на выставе ў Вільні;
— фотапраекты, якія занялі 1, 2 і 3 месца ў адкрытай намінацыі, увойдуць у выніковы зін PhotoArtDoc 2024;
— у анлайн-галерэі фестывалю PhotoArtDoc і на інфармацыйных рэсурсах партнёраў будуць прадстаўлены фотапраекты, якія занялі 1, 2 і 3 месца ў адкрытай намінацыі.
Як падаць заяўку?
Падаць заяўку на ўдзел у конкурсе можна па спасылцы.
Апошні тэрмін падачы: да 7 верасня 2024 года (23.59 CET).
Колькасць праектаў ад аднаго аўтара — не больш за 2-х; кожны праект падаецца асобнай заяўкай.
Колькасць фатаграфій у адным праекце — ад 10 да 15.
Усе фотапраекты, павінны быць зроблены ў перыяд з 2020 па 2024 год.
Падрабязней пра тэхнічныя параметры фотаздымкаў чытайце тут.
PhotoArtDoc — гэта фестываль фатаграфіі, з тэматыкай на стыку дакументалістыкі і мастацтва. Такая фатаграфія заклікана не толькі фіксаваць рэчаіснасць, але і адчыняе перад аўтарамі шырокія магчымасці ў даследаванні і інтэрпрэтацыі падзей, з’яў і тэндэнцый у сучасным грамадстве. На сённяшні дзень – гэта адна з найбольш запатрабаваных сфер у фатаграфіі, да якой звяртаюцца аўтары па ўсім свеце ў спробах асэнсаваць рэальнасць.
«Запускаючы PhotoArtDoc, мы імкнемся сабраць на адной пляцоўцы беларускіх фатографаў розных пакаленняў, якія раз’ехаліся па розных краінах і тых, хто працягвае жыць і працаваць у Беларусі, — тлумачыць канцэпцыю падзеі куратар фестывалю, фатограф Сяргей Міхаленка. — Так, сітуацыя зараз склалася так, што беларускі фотаздымак перажывае няпростыя часы. Многія аўтары былі вымушаны з’ехаць з Беларусі, што прывяло да істотнай атамізацыі фатаграфічнай супольнасці, якая толькі пачала фармавацца.
PhotoArtDoc — гэта ўвасабленне нашых намаганняў па стварэнні аб’яднаўчай платформы, якая дазволіць аднавіць сувязі і будзе спрыяць пераемнасці».
Фінальная выстава Фестывалю Фатаграфіі плануецца ў Вільні ўвосень 2024 года.