Урад Новай Зэляндыі наклаў дадатковыя санкцыі на Беларусь за падтрымку ёю расейскай агрэсіі супраць Украіны.
Як адзначаецца ў паведамленьні Міністэрства замежных справаў Новай Зэляндыі, разам з санкцыямі для 65 караблёў ценевага флёту Расеі краіна ўвяла абмежаваньні для суб’ектаў гаспадараньня зь Беларусі, Ірану і Паўночнай Карэі, якія ўдзельнічаюць у перапрацаваньні і транспартаваньні расейскай нафты, а таксама ў спрыяньні выплатам, зьвязаным з нафтаю.
«Гэтыя субʼекты ёсьць часткаю шырэйшай сеткі, якая дазваляе гандляваць расейскай нафтай, падрываючы глябальныя намаганьні дзеля скарачэньня фінансаваньня агрэсіўнай вайны Расеі», — сказаў міністар замежных справаў Новай Зэляндыі Ўінстан Пітэрс.
Цяпер у санкцыйны сьпіс уключылі наваполацкі «Нафтан» і дзяржаўную кампанію «Белнафтахім».
Краіны Эўразьвязу, ЗША, Канада, Вялікая Брытанія і Японія пачалі накладаць санкцыі на Беларусь пасьля жорсткага разгону акцыяў пратэсту супраць фальсыфікацыі вынікаў прэзыдэнцкіх выбараў у 2020 годзе. Пазьней санкцыі пашырылі за падтрымку ўладамі Беларусі расейскай ваеннай агрэсіі супраць Украіны.
