У Дзяржаўнай памежнай службе Ўкраіны паведамілі аб выяўленьні ў Валынскай вобласьці паветранага балёну з кантрабанднымі беларускімі цыгарэтамі.
Як паведамілі ў Заходнім рэгіянальным упраўленьні памежнай службы, балён знайшлі недалёка ад беларуска-ўкраінскай мяжы ў Шацкім раёне. Памежнікі мяркуюць, што цыгарэты, імаверна, плянавалі пераправіць у краіны Эўразьвязу.
Пакет быў абгорнуты чорнай поліэтыленавай плёнкай, да якога была прымацаваная вяроўка з рэшткамі паветранага балёну. Унутры знаходзіліся 1500 пачкаў цыгарэт маркі «Мінск» з акцызнымі маркамі Рэспублікі Беларусь, а таксама дзьве прылады GPS: адна з SIM-карткай ад беларускага апэратара сувязі, другая з SIM-карткай ад апэратара Рэспублікі Польшча.
Арыентаваная вартасьць знойдзеных цыгарэт складае прыблізна 90 тысяч грыўняў, што эквівалентна крыху больш за 2 тысячам даляраў.
Раней паветраныя балёны інтэнсіўна запускаліся на беларуска-літоўскай мяжы.
