Беларускія журналісты Аляксандр Івулін і Мікіта Мелказёраў запусціліі сумесны падкаст «Нешта будзе». Да яго прадугледжаны толькі платны доступ — мінімальная сума 10 еўра ў месяц, максімальная — 50.
«Мы не працавалі разам з часоў «Трыбуны», вось вырашылі паспрабаваць яшчэ раз. Тым больш Мікіта енчыў пра падобны фармат апошнія чатыры гады – і ўсё ніяк не мог распачаць», — пішуць вядоўцы ў анонсе да першага выпуску.
Івулін і Мелказёраў распавялі, што тэму для іх размовы змогуць выбіраць слухачы. Падкасты будуць з’яўляцца два разы на месяц. Першы выпуск ужо выйшаў, і ён — пра футбол.
«То бок не пра футбол, а масавую культуру, якую ён правакуе. Мы абодва – яе ахвяры. Танныя сінтэтычныя майкі на кірмашах, бутсы на некалькі памераў большыя, постэры і натхненне, якое давалі культавыя персанажы нашага дзяцінства. Дэвід Бэкхэм, Зінедзін Зідан, дэградацыя Аляксандра Глеба і нечакана зламаны стол на «Барысаў-Арэне».
Што з гэтага ўсяго атрымаецца, ніхто не ведае. Але рабіць беларускі варушняк цікава».
За навінамі пра новы падкаст Івулін і Мелказёраў прапануюць сачыць на іх старонках у Instagram.
