Тынэйджэрская драма на беларускі лад, дакументальнае даследаванне граняў свабоды ў Еўропе і ў Беларусі, псіхатэрапеўтычная драма пра складанасці эміграцыі і нават сацыяльна-фантастычны трылер, — у анлайн-кінатэатры VODBLISK за месяц дадалося ўнікальных фільмаў. Расказваем, чаму на іх прагляд не шкада выдаткаваць некалькі вечароў.
«Лета 1989»
Напэўна, у вашым спісе «прагледжана» значыцца далёка не адзін амерыканскі серыял і фільм пра падлеткаў. А ці шмат вы бачылі беларускіх фільмаў пра гэты адначасова цудоўны і жудасны ўзрост, праз які ўсе праходзяць? Рэжысёр Уладзiмiр Казлоў зняў такі фільм с назвай «Лета 1989», а ў вас ёсць магчымасць яго паглядзець.
Падзеі чорна-белай стужкі пераносяць гледача у канец ліпеня 1989 года, у БССР. Пяцёра сяброў разам выпраўляюцца ў паход, каб адпачыць пасля выпускных і ўступных іспытаў. Знаходзячыся «на парозе» сапраўднага дарослага жыцця сябры абмяркоўваюць гэты новы перыяд, дзеляцца сваімі надзеямі і чаканнямі. Між тым адпачынак перарастае ў яшчэ адзін іспыт…
Трэйлер: https://youtu.be/FFLyPJ2TFyc
«Край свету»
Ганна Саўчанка у фільме «Край свету» дакументуе гісторыі людзей, якія жывуць на памежжы Беларусі і Літвы. Тых, чыё жыццё непазбежна мяняецца з закрыццём мяжы. Каб па-ранейшаму завітаць да сваякоў і сяброў, наведаць касцёл ці могілкі, ім трэба прадрацца праз бюракратычнае пекла раскладаў, дазволаў і візаў. Гэта такое дакументальнае даследаванне, якое расказвае пра дзве абсалютна розныя канцэпцыі свабоды: пра тую, якая ёсць у Еўропе, і пра тую, што ў Беларусі.
У фільме нават ёсць сцэна, у якой з’яўляецца Алесь Бяляцкі, заснавальнік Праваабарончага цэнтра «Вясна», лаўрэат Нобелеўскай прэміі міру 2022 года.
Трэйлер: https://youtu.be/gU-1Z2RW9aU
«Дзённік Анастасіі»
Ці памятаеце трэк, што з’явіўся ў пачатку гэтага лета, пасля праслухоўвання якога на рэпіце круціцца ў галаве: «Ой не кажы, не кажы ты мне хто я»? Рэжысёр Максім Буйніцкі ў 2022 годзе зняў фільм пра аўтарку таго самага трэка, а таксама мастачку Анастасію Рыдлеўскую.
Стужка «Дзённік Анастасіі» стала сапраўднай дакументальнай споведдзю аб жыцці ў эміграцыі і тых цяжкасцях, якія яна з сабой нясе. Фільм атрымаў Спецыяльную згадку журы на кінафестывалі «Паўночнае ззянне — 2023». Рэжысёр далікатна фіксуе цярністы шлях гераіні і стварае цёплы партрэт чалавека, якога цікава пазнаваць.
Трэйлер: https://youtu.be/dP3NJpNih9U
«Маланка»
«Маланка» — ігравы фільм Агаты Міхайлавай у жанры (увага!) фантастычнага рэалізму. Стужка знята па матывах аповеда беларускага пісьменніка Валера Гапеева «Аўтобус». У метафарычнай форме апісаны жахі і комплексы сучаснага беларускага грамадства, няўпэўненасць і раз’яднанасць, якія знікаюць у адпаведную экстрэмальную хвіліну. «Маланка» атрымала ўзнагароды за найлепшы сцэнар і мастацкія рашэнні на кінафестывалі ў Ерэване.
Па сюжэце 11 розных пасажыраў разам едуць з маленькага мястэчка ў Менск. Раптам у іх аўтобус трапляе маланка — цяпер ён ездзіць толькі па коле і не можа спыніцца. Гэтыя абставіны вымушаюць герояў аб’яднацца дзеля вызвалення. Пытанне ў тым: ці атрымаецца гэта ў іх?
Трэйлер: https://youtu.be/ReZjf5cjFUk
Дарэчы, калі вы жывяце па-за Беларуссю, то можаце любы з гэтых фільмаў паглядзець за 5$. Калі ж вы знаходзіцеся ўнутры краіны, то прагляд даступны бясплатна.
Каб гледачы платформы VODBLISK маглі глядзець беларускае кіно (і не толькі) абсалютна легальна, каманда праекту плаціць рэжысёрам і рэжысёркам за размяшчэнне кантэнту. Калі вы шануеце магчымасць глядзець «сваё» кіно і фестывальныя хіты замежжа, падтрымайце каманду праекту данатам.
Пры падтрымцы: LTAID — Lithuania development cooperation, CPVA — Central Project Management Agency.
Пры інфармацыйнай падтрымцы: Беларуская Рада культуры, HER Docs.
