27 лістапада беларусы па ўсім свеце ўрачыста адзначаюць Дзень Герояў.
105 гадоў таму адважныя ваяры Першага Слуцкага палка стральцоў далі ўзброены адпор бальшавікам, каб абараніць незалежнасць нашай першай дзяржавы – Беларускай Народнай Рэспублікі. Беларускія сыны ў тых няроўных і самаахвярных баях з чужынцамі былі разгромленыя. Але сапраўдную і вечную перамогу ў тыя дні атрымалі вера і надзея случчакоў у будучыню Беларусі. Натхнёнасць герояў Слуцкага Збройнага чыну высокімі нацыянальнымі ідэаламі і цяпер запальвае прагу волі ў душах новых пакаленняў беларусаў, напаўняе сэрцы Герояў Беларусі сённяшняй.
Хай воля вечна будзе з намі! Слава Героям! Жыве Беларусь!
ЗБС „Бацькаўшчына“
