Амбасада ЗША ў Беларусі пракамэнтавала вызваленьне больш як 200 беларускіх палітвязьняў і чарговым разам заклікала вызваліць усіх палітычных зьняволеных.
«Зімовыя сьвяты — гэта цудоўная нагода сабрацца са сваімі блізкімі і разьдзяліць зь імі моманты разам. Аднак ня ўсе з нас маюць такую магчымасць: больш за 1250 палітвязняў нясправядліва знаходзяцца за кратамі ў Беларусі. Хоць мы і радыя паведамленьням аб вызваленьні больш як 200 палітвязьняў за апошнія месяцы, мы працягнем патрабаваць вызвалення ЎСІХ палітзьняволеных», — гаворыцца ў паведамленьні амбасады ЗША ў Беларусі ў сацсетках.
З чэрвеня 2024 году праз памілаваньне на волю выйшлі 207 зьняволеных, асуджаных паводле «экстрэмісцкіх» артыкулаў. Апошні ўказ аб памілаваньні быў падпісаны 9 снежня, па ім вызвалілі 29 чалавек. Новыя арышты, суды і выракі працягваюцца.
