“Цяпер нашую падтрымку могуць адчуць не толькі беларусы, але і ўкраінцы”, — распавёў «Радыё Рацыя», кіраўнік фонду Андрэй Стрыжак.
— Мы пачалі нашую дапамогу 3 гады таму, у 2022 годзе. З першага ж дня поўнамаштабнага ўварвання расейскіх войскаў на тэрыторыю Украіны. І дзве асноўныя катэгорыі праз якія мы аказвалі дапамогу цягам гэтых трох гадоў, гэта ўкраінскія медыкі з адной з добраахвотных структур, першы дабравольны мабільны шпіталь. Мы туды пастаўлялі аўтамабілі, некалькі дзясяткаў машынаў рэанімацыі, джыпаў, якія таксама былі перабудаваныя ў рэанімацыйныя аўтамабілі. А таксама гэта беларускія добраахвотнікі, якія ваююць у шэрагах украінскага войску. Мы не рабілі адрозненняў у якіх аддзелах яны ваююць.
Праз 3 гады можна сказаць, што сітуацыя змянілася і мы адышлі ад канцэпта агульнага збора на гэтыя мэты. Цяпер мы падтрымліваем збольшага зборы, з якімі да нас прыходзяць беларускія добраахвотнікі і людзія, якія ўжо больш не служаць у ўкраінскім войску, але траўмаваліся або параніліся за час службы.
Вельмі важна, што тая дапамога, якую мы аказваем, яна носіць нелетальны характар. Мы не купляем зброі, не перадаём зброі, у нас ёсць мандат, які нас абмяжоўвае ў гэтым, і гэта збольшага транспарт, сродкі абароны, каскі, панцыры, сродкі сувязі, медыцына і іншыя рэчы.
РР: Калі казаць пра беларускую павестку, то мы назіраем чарговую хвалю вызвалення палітвязняў. Як гэта адбіваецца на працы BySol? Ці павялічваецца колькасць людзей, якія звяртаюцца да вас?
— У нас ёсць два асноўных кірункі аказання дапамогі. Першы — разавая выплата, якую мы выплочваем людзям, якія выйшлі з турмы. Яна на сённяшні дзень складае 1000 еўра. Гэтую суму мы можам выплочваць дзякуючы намаганням па пошуку сродкаў і ў тым ліку рознымі інстытуцыйнымі структурамі, напрыклад, дзякуючы офісу Святланы Ціханоўскай быў створаны міжнародны гуманітарны фонд, куды ўходзіць таксама BySol і ў нас ёсць мажлівасць адтуль атрымліваць сродкі. У першую чаргу гэта сродкі, якія вылучаюць на дапамогу беларускім палітвязняў, урады паўночных краін: Швецыя, Нарвегія, Данія і іншыя краіны, што далучыліся да гэтага гуманітарнага фонду.
Калі гаварыць пра тое, якія ёсць яшчэ мажлівасці дапамогі, то ў нас яшчэ можна адкрыць персанальны збор, які таксама можна адкрыць чалавеку, і там самыя розныя сумы людзі запытваюць, я думаю, што не менш за 1500 тысячы звычайна ставяць мэту такога збору і верхняя планка не абмежаная фактычна, бо ў людзей розныя бываюць сітуацыя, што часам вымагаюць вялікіх грашовых выдаткаў.
Калі гаварыць пра тое, наколькі моцна ўплываюць гэтыя хвалі вызваленняў. Я б не сказаў, што гэта робіць суперусплескі па зваротах у нашую структуру. У нас ёсць досыць сталая плынь людзей, якія прыходзяць па дапамогу. Падвышаная колькасць людзей фіксуецца хутчэй, калі мы праводзім нейкія кампаніі. Прыкладам, тройчы на год мы праводзім кампаніі падтрымкі дзяцей палітвязняў і вызваленых палітвязняў на Каляды, першага верасня, пачатак лета — вось тады да нас адначасна можа прыйсці 250 заявак адначасна ад гэтых сем’яў.
Цалкам слухайце ў далучаным гукавым файле:
