22 сакавіка кіраўнік ураду Польшчы Дональд Туск правёў сустрэчу з прадстаўнікамі сілавых структур у падразьдзяленьні Памежнай службы ў горадзе Крынкі Падляскага ваяводзтва, які мяжуе з Бераставіцкім раёнам Горадзенскай вобласьці.
Падчас сустрэчы з салдатамі і афіцэрамі на памежным абʼекце ў Крынках на Падляшшы кіраўніцтва польскага ўраду абмеркавала праблемы і зрабіла высновы па ахове дзяржаўнай мяжы, паведаміла Міністэрства абароны Польшчы.
Польшча дасягнула «98% эфэктыўнасьці затрыманьняў» нелегальных мігрантаў, якія імкнуцца перасячы мяжу зь беларускай тэрыторыі, заявіў на прэсавай канфэрэнцыі па выніках нарады польскі прэмʼер-міністар Дональд Туск.
«Гэта значыць 98 са 100 спроб незаконнага перасячэньня мяжы прадухіляюцца дзякуючы рашучым дзеяньням нашых салдат, Памежнай службы і паліцыі, — цытуе Туска прэс-служба Міністэрства абароны Польшчы. — Мы мабілізуем Эўропу, каб абарона гэтай мяжы ўспрымалася як агульны абавязак».
«Мы атрымалі чарговае пацьвярджэньне таго, што як „Шчыт Усход“ (польская праграма па ўмацаваньні мяжы зь Беларусьсю і Расеяй), якая прадугледжвае вайсковы аспэкт аховы мяжы, так і абарона ад незаконных перасячэньняў, зьяўляюцца агульным эўрапейскім абавязкам».
Паводле яго слоў, агулам на мяжы зь Беларусьсю знаходзіцца 11 тысяч вайскоўцаў, памежнікаў і паліцыянтаў.
Міністар нацыянальнай абароны Польшчы Ўладзіслаў Касіняк-Камыш паведаміў, што пастаянна на мяжы знаходзіцца каля 5 тысяч салдат, у рэзэрве — яшчэ 1 тысяча. Усяго для апэрацыі па ахове мяжы выдзелена 17 тысяч вайскоўцаў.
«Павышэньне ўпэўненасьці салдата ў выкарыстаньні зброі і забесьпячэньне яго адпаведным рыштункам — бронекамізэлькамі, адзеньнем, абуткам — ключавыя пытаньні»,— заявіў міністар.
Мігранцкі крызіс на мяжы Беларусі і краін Эўразьвязу працягваецца зь вясны 2021 года.
Улады суседніх эўрапейскіх дзяржаў лічаць яго «гібрыднай атакай», арганізаванай рэжымамі ў Менску і Маскве.
Аляксандр Лукашэнка неаднаразова заяўляў, што беларускія памежнікі ня будуць спыняць нелегальных мігрантаў, якія ідуць у Эўразьвяз праз Беларусь, таму што іх туды «пазвалі».
