З 10 па 12 сакавіка 2025 году праваабарончы цэнтр “Вясна”, Libereco і Суполка беларусаў у Шатландыі зладзілі экспазіцыю ў будынку парламента ў Эдынбурзе, прысвечаную беларускім палітвязням. Імпрэзу арганізавалі, каб распавесці пра сітуацыю з правамі чалавека ў Беларусі.
Выстава дала магчымасць усім шатландскім парламентарыям даведацца больш пра палітычную сітуацыю і сітуацыю з правамі чалавека ў Беларусі. Падчас экспазіцыі таксама больш за 20 дэпутатаў парламента выказалі зацікаўленасць далучыцца да кампаніі #Westandbyou на знак салідарнасці з беларусамі, асуджаных да доўгіх тэрмінаў турэмнага зняволення за іх барацьбу за дэмакратыю і свабоду, і стаць іх “хроснымі” бацькамі.
Мерапрыемства стала магчымым дзякуючы Вілі Рэні, хроснаму бацьку Алены Маліноўскай. Спадар Рэні адзначыў: “Я веру, што кожны павінен мець права на палітычнае самавыяўленне і свабоду слова. Дэмакратыя і свабода слова — каштоўныя і далікатныя рэчы, і я спадзяюся, што беларусы на ўласным досведзе пераканаюцца ў гэтым, калі вызваляцца ад дыктатуры Аляксандра Лукашэнкі”.
“Тут, у парламенце Шатландыі, мы абмяркоўваем і не згаджаемся адзін з адным, і мы робім гэта, не асцерагаючыся турмы ці пераследаў. Пераслед столькіх нявінных беларусаў і існаванне столькіх палітычных зняволеных — гэта абуральна. Я падтрымліваю народ Беларусі, які імкнецца да ўласных свабод і справядлівасці ў сваёй уласнай краіне. Я рады, што змог падтрымаць Libereco, “Вясну” і Народнае консульства Беларусі ў правядзенні выставы ў парламенце Шатландыі, і я рады, што так шмат маіх калегаў у парламенце таксама падтрымліваюць дэмакратыю ў Беларусі”, — сказаў ён.
Да гэтага “хроснымі” былі яшчэ 13 парламентарыяў, сярод іх — хросны палітвязня Арцёма Касакоўскага Кенет Гібсан. Ён распавёў пра размову, якая адбылася ў яго падчас экспазіцыі з прадстаўнікамі Libereco.
“З кастрычніка мінулага года я аказваю “хросную падтрымку” беларускаму палітвязню, — напісаў ён. — Арцём Касакоўскі, які працаваў оптыкам, знаходзіцца пад вартай з 27 верасня 2020 года за ўдзел у негвалтоўных акцыях пратэсту супраць фальсіфікацыі прэзідэнцкіх выбараў. Цяпер ён адбывае 6,5 гадоў турэмнага зняволення. У Libereco змаглі даць абноўленую інфармацыю аб сітуацыі з Арцёмам і ягонай маці, якая знаходзіцца пад хатнім арыштам.
Абуральна, што простыя беларусы, такія як Арцём і члены іх сем’яў, падвяргаюцца такім драконаўскім мерам з боку карумпаванага і аўтарытарнага рэжыму Лукашэнкі. Арцёму і яго сям’і я хачу яшчэ раз выказаць сваё захапленне іх мужнасцю. Хоць мы мала што можам зрабіць, каб палегчыць іх пакуты, я працягну асвятляць яго цяжкае становішча і выкажу сваю салідарнасць ад імя парламента Шатландыі”.
Кен Макбейн, прадстаўнік Libereco ў Вялікабрытаніі, адзначыў: “Было вельмі прыемна пагутарыць са столькімі парламентарыямі ў маёй уласнай краіне, якія горача клапоцяцца аб правах чалавека, дэмакратыі і справядлівасці, а таксама аб іх клопаце пра тысячы беларусаў, якія пацярпелі праз рэжым Лукашэнкі. Так шмат парламентарыяў у свае напружаныя працоўныя дні, паміж пасяджэннямі камітэтаў і парламенцкімі дэбатамі, знаходзілі час спыніцца і пагаварыць пра Беларусь. Я надзвычай цаню іх цікавасць і жаданне падтрымаць барацьбу беларусаў за свабоду”.
