Міністарка замежных спраў Латвіі Байба Бражэ заявіла, што вызваленьне некалькіх палітвязьняў не зьяўляецца дастатковым доказам сур’ёзных зьменаў у палітыцы беларускіх уладаў.
«Мы чакаем, што беларускі рэжым вызваліць больш за тысячу вязьняў, якія ўсё яшчэ знаходзяцца там, і гэта толькі палітычныя вязьні, а ёсьць яшчэ і іншыя, зьняволеныя паводле іншых перадумоваў», — сказала Байба Бражэ ў інтэрвію Радыё Свабода.
Кіраўніца зьнешнепалітычнага ведамства Латвіі нагадала, што «Беларусь дазваляе Расеі весьці вайну ва Ўкраіне», церазь яе тэрыторыю «маршыруюць расейскія войскі», і «Расея цалкам уключыла Беларусь у падрыхтоўку вучэньняў „Захад“».
У адказ на пытаньне, ці пачала б Латвія транзыт беларускіх калійных угнаеньняў, калі б пра гэта папрасілі ЗША, Байба Бражэ адказала, што такога запыту ад ЗША не было, а беларускія ўгнаеньні знаходзяцца пад цэлым спэктрам санкцый.
