Міжнародны фестываль «Месяц фатаграфіі ў Мінску» трэці раз запар будзе праводзіцца ў Польшчы.
16 чэрвеня – у межах міжнароднага фотафестывалю ў Лодзі – адкрыецца выстава беларускіх аўтараў «Паміжжа».
Выстава складаецца з праектаў, якія аўтары стваралі ў розныя перыяды часу. Частка з іх – гэта асэнсаванне жыцця апошніх трох гадоў, іншыя праекты былі створаны раней, але ўсе яны апісваюць сустрэчу са станам зыбкай памежнасці паміж нармальным жыццём і вайной, турмой, выганнем, смерцю.
Апынуўшыся дзесьці паміж: паміж гістарычнымі перыядамі, паміж магчымасцямі, паміж марамі – мінулае перастала быць тым, на што можна абаперціся, каб зрабіць крок наперад, будучыня страціла перспектыву. Далягляд завалены, усё па-за рэзкасцю. Транзітны стан і чаканне зрабілася самім жыццём. Вялікія ідэі і мары сціснуліся да побытавага, няўстойлівага і крохкага зараз. Надзея знікае і рассейваецца ў тумане Паміжжа.
Удзельнікі: Маша Святагор, Аляксандр Васюковіч, OB, Аляксандр Зяньковіч, Андрэй Шкiлёнак, Кацярына Кузьмічова, Паша Крычко, Макс Швед, Вiталь Стужка, Міхаіл Мішук, Яўген Атцецкі, Канаплёў+Лейдзік, AL, SL, IH, Вера Мірская, Беларускі Клімат.
Першы раз міжнародны фотафестываль “Месяц фатаграфіі ў Мінску” адбыўся ў Беларусі ў 2014 годзе. Ён ствараўся з мэтай узмацнення статусу беларускай фатаграфіі ў рэгіёне і свеце ды пашырэнне разумення фатаграфічнага медыума ды фатаграфічнай культуры.
У 2021 годзе фестываль быў вымушаны пераехаць у Польшчу.
Час: 16 чэрвеня ў 19.00.
Месца: Лодзь, Piotrkowska 138/140, OFF Piotrkowska, 3 паверх.
Міжнародны фотафестываль у Лодзі “Nadzieja / Hope”, у межах якога пройдзе “Месяц фатаграфіі ў Мінску, адбудзецца з 15 па 25 чэрвеня.
