“Вельмі цікавай выбарчай гонкай” назвала дэмакратычны лідар Беларусі Святлана Ціханоўская выбары прэзідэнта ЗША і павіншавала Дональда Трампа з перамогай.
Паводле прэс-службы дэмлідара, Ціханоўская сачыла за гонкай “нават з некаторай зайздрасцю, бо беларусы пазбаўленыя права выбару ўжо шмат гадоў”.
“Гэта сапраўды вялікая раскоша — не ведаць, хто будзе наступным прэзідэнтам. Менавіта такія выбары — жывыя, дынамічныя, эмацыйныя, а галоўнае празрыстыя і справядлівыя — мы б хацелі пабачыць у Беларусі?” — адзначыла палітык.
Ціханоўская паведаміла, што дэмакратычныя сілы маюць кантакты з атачэннем Трампа і прадстаўнікамі Рэспубліканскай партыі і плануюць “працаваць з новай адміністрацыяй, працягваць і ўмацоўваць адносіны”.
“Мы разлічваем, што палітыка ў дачыненні да Беларусі будзе рашучай, паслядоўнай, і прынцыповай. Беларусь павінна заставацца на міжнародным парадку дня. І амерыканскае лідарства грае ў гэтым надзвычай важную ролю”, — адзначыла Ціханоўская, дадаўшы, што ЗША “былі, ёсць і будуць нашымі саюзнікамі ў барацьбе за дэмакратычную, незалежную і мірную Беларусь”.
Як заявіў “Позірку” галоўны дарадца дэмакратычнага лідара Франак Вячорка, каментуючы перамогу Трампа, беларускія дэмсілы і ЗША працягнуць працу ў межах стратэгічнага дыялогу, ў снежні адбудзецца наступная яго сесія (праз год пасля першай у Вашынгтоне; пройдзе да інаўгурацыі Трампа. — “Позірк”.).
“Я не думаю, што варта чакаць нейкі істотны разварот. У бліжэйшыя месяцы стане ясна, хто зойме ключавыя пасады ў новай амерыканскай адміністрацыі”, — мяркуе Вячорка.
6 лістапада Ціханоўская знаходзілася ў Страсбургу на Сусветным форуме за дэмакратыю.
