Not Made For Politics — такую назву мае новая дакументальная стужка Волі Чайкоўскай — беларускай прадзюсаркі і кіраўніцы фестывалю Паўночных і Балтыйскіх краін «Паўночнае ззянне». Гэта будзе першы поўны метр кінематаграфісткі, над якім яна працавала больш за чатыры гады.
Фільм ствараўся ў капрадукцыі Эстоніі, Францыі і ЗША. Сярод капрадзюсараў заяўлены буйны «гулец» — амерыканскі стрымінгавы сервіс HBO Max.
— З пытанняў бяспекі я пакуль шмат пра гэты фільм не распавядаю, — падзялілася з Reform.by Воля Чайкоўская. — Але для мяне гэта кіно — вялікая веха: чатыры гады маёй прадзюсарскай, рэжысёрскай, аператарскай, гукарэжысёрскай працы і курыравання вялікай каманды капрадзюсараў. Гэта каштоўны досвед, часта вельмі складаны, але, безумоўна, пасля якога я магу казаць, што перайшла на новую прыступку.
Больш інфармацыі пра дакументальную карціну мусіць з’явіцца пазней, пасля прэм’еры стужкі над адным з фестываляў. Зараз кіно — на этапе постпрадакшэну.
Not Made For Politics (у фільма пакуль няма беларускай назвы) — не адзіны кінапраект, у які ўключана Воля Чайкоўская. Як прадзюсарка яна працуе над ігравой стужкай Mari, Sweetie эстонскай рэжысёркі Вівіян Садэ (Vivian Säde). Гэтаксама Воля Чаўкоўская — у прадзюсарскай камандзе ігравой карціны War on women эстонскай кінематаграфісткі Марыс Салюмец (Maris Salumets).
У распрацоўцы беларускай фільммейкеркі і персанальны новы праект — гібрыдная дакументальна-ігравая стужка Mono.
— Калі шчыра мне хочацца часам зусім сыйсці ў творчасць, — прызнаецца Воля, — бо вельмі стамляешся ад менеджменту і адміністрацыйнай працы. Аднак той жа прадзюсарскі досвед — вельмі каштоўная рэч, гэтыя навыкі — тое, у чым мае асаблівую патрэбу беларускае кіно. Таму прыходзіцца ўсё сумяшчаць.
Паглядзець дэбютны кароткі метр Волі Чайкоўскай можна тут.
