«Тры чалавекі. Тры інтэрв’ю на „Радыё Рацыя“. А потым — смерць, знікненні і пытанні, на якія дагэтуль няма адказаў», — так анансуецца відэа, прысвечанае тром асобам, лёсы якіх выклікалі шмат пытанняў.
13 кастрычніка 2026 года нечакана памёр вядомы ізраільскі блогер і ваенны эксперт Рыгор Тамар. Улетку ён даў інтэрв’ю „Радыё Рацыя“, а на кастрычнік журналісты планавалі новую сустрэчу з ім. Ягоная смерць стала нечаканасцю для калег, слухачоў і прыхільнікаў.
У відэа згадваюцца карані Тамара ў Беларусі, ягонае бачанне будучыні краіны, ацэнкі палітычнай постаці Аляксандра Лукашэнкі, а таксама магчымыя наступствы дэстабілізацыі Расеі і замарожвання вайны ва Украіне для Беларусі.
Другі сюжэт прысвечаны Анжаліцы Мельнікавай, былой спікерцы Каардынацыйнай рады, якая знікла ў 2025 годзе. Пазней у журналісцкіх расследаваннях з’явіліся звесткі пра яе магчымыя сувязі з беларускімі спецслужбамі, а таксама паведамленні пра меркаванае прысваенне грошай і набыццё нерухомасці ў Менску. Гэтыя сцвярджэнні патрабуюць належнай праверкі. „Радыё Рацыя“ вяртаецца да інтэрв’ю, якое Мельнікава дала незадоўга да свайго знікнення. Сярод закранутых тэм — яе першае інтэрв’ю па-беларуску, гісторыя Рамана Пратасевіча, люстрацыя і адказнасць дзяржаўных чыноўнікаў.
Трэці герой — Анатоль Котаў, былы высокапастаўлены чыноўнік рэжыму Лукашэнкі, які пазней далучыўся да апазіцыйнай дзейнасці. У жніўні 2025 года ён выехаў у Турцыю і больш не вярнуўся. У відэа гучаць фрагменты ягонага апошняга інтэрв’ю Радыё Рацыя, у якім Котаў разважаў пра магчымы канец палітычнай кар’еры Лукашэнкі і будучыню Беларусі пасля вайны. Асобная частка прысвечаная дзвюм версіям ягонага знікнення, у тым ліку магчымаму следу расейскіх спецслужбаў.
Відэа аб’ядноўвае тры розныя гісторыі, у кожнай з якіх застаюцца невырашаныя пытанні. Журналісты прапануюць зноў пачуць, што гэтыя людзі казалі пра Беларусь і яе будучыню, яшчэ да таго, як іх лёсы набылі трагічны або загадкавы характар.
Паглядзець відэа можна на YouTube-канале «Радыё Рацыя».
