Першым сумесным сінглам у стылі hard techno пад назвай «Тут нікому не месца» музыкі падзяліліся ў сваіх сацсетках.
«Гэты запіс пачаўся ў доміку Грабажа — у парку на месцы старадаўніх французскіх могілак у Шэціне. Ад могілак толькі гэты дамок і застаўся. І яшчэ некалькі надмагілляў і асабліва ціхая атмасфера. Праўда, на даху жыла куніца. Злавесна шумная і непрыемна актыўная. Яна кагосьці кожную ноч ела на даху. І слухаць гэта было жудасна непрыемна, — распавяла пра гісторыю стварэння сінгла і новага альбому Света Бень.
Вокладку для сінгла стварыла Masha Garash.
Мы з Сяргеем Навіцкім запісвалі там альбом — шукалі гукі ў самім доме і навакол, гралі з раніцы да ночы, ведаючы што нікому не перашкаджаем. Напэўна, мы заміналі толькі куніцы, і яна адыгрывалася на нас па начах. Дах грукатаў так, быццам бы куніца бегала па ім на абцасах.
Я перабірала тэксты, напісаныя за апошнія пару гадоў. Вясёлага ў іх было мала. Як і ва ўсім навокал. Альбом атрымліваўся гэткі ж як домік — каменны, касцяны, грукатлівы, маласуцяшальны. Суцяшалі толькі старыя дрэвы ў парку, але мы ўвесь час штосьці запісвалі ці гралі, і да шпацыру справа так і не дайшла. Потым мы з’ехалі ў Берлін і вось зараз пачалі патроху выпускаць гэтыя песні ў свет.
Першымі паляцелі Буслы, якія выносяць дзяцей падалей ад тых месцаў, дзе нікому няма месца. Толькі куды выносяць так і не ясна. Дзе яны, бяспечныя мясціны — ніхто не ведае. Нават куніца, якая больш нікога не грызе па начах, таму што яна загінула ў бойцы за тэрыторыю з барсуком, які пасяліўся ў парку.
Але хочацца спадзявацца, што хаця б буслы ведаюць што рабіць. І што небудзь зробяць», — напісала пра новую песню і анансавала настрой будучай плыткі Света Бень.
