![](https://zbsb.info/wp-content/uploads/2024/07/d2b5ca33bd970f64-108-1024x576.png)
5 ліпеня Нобэлеўскі цэнтар міру зладзіў акцыю салідарнасьці зь палітзьняволеным старшынём «Вясны», Нобэлеўскім ляўрэатам Алесем Бяляцкім і іншымі палітвязьнямі Беларусі.
Роўна а 12:00 кожную пятніцу ў летнія месяцы голуб міру вылятае з акна Нобэлеўскага цэнтру міру ў Осла (Нарвэгія). Калі ён пралятае над гарадзкой плошчай у Осла, званы мэрыі граюць мэлёдыю песьні Джона Ленана «Дайце міру шанец» (Give Peace a Chance).
5 ліпеня голуба міру выпусьцілі ў падтрымку і «з надзеяй на вызваленьне» кіраўніка беларускага праваабарончага цэнтру «Вясна», Нобэлеўскага ляўрэата прэміі міру Алеся Бяляцкага, які ўжо амаль тры гады знаходзіцца за кратамі, а таксама ў падтрымку ўсіх беларускіх палітвязьняў. Відэа акцыі апублікаваў акаўнт «Вясны» у сацыяльнай сетцы Х.
🕊️The Peace Dove in support of #NobelPeacePrize laureate Ales Bialiatski
— #FreeViasna (@FreeViasna) July 5, 2024
Precisely at 12:00 every Friday in the summer months, the peace dove flies from the window of the @NobelPeaceOslo. As it flies over Rådhusplassen, the city hall bells play John Lennon's song Give Peace a… pic.twitter.com/XafQiHhH9T
«На гэтым тыдні лідэр краіны Аляксандар Лукашэнка вызваліў 10 палітвязьняў* у сувязі з амністыяй, і падаў сыгнал, што іншыя цяжкахворыя палітвязьні таксама могуць быць вызваленыя. Так што сёньня наш голуб міру паляціць з надзеяй на вызваленьне Нобэлеўскага ляўрэата прэміі міру Алеся Бяляцкага і іншых палітвязьняў у Беларусі», — прамовіла прадстаўніца Нобэлеўскага цэнтру міру перад запускам голубу міру.
*Паводле апошніх зьвестак, праваабаронцам «Вясны» дакладна вядома ўжо пра 18 палітзьняволеных, якія выйшлі на волю 3 ліпеня. Сярод іх — 4 жанчыны і 14 мужчын, у тым ліку асуджаны да 10 гадоў калёніі і хворы на анкалёгію Рыгор Кастусёў.
Праваабаронцы падтрымліваюць інфармацыйную цішыню для бясьпекі вязьняў, таму пакуль не публікуюць прозьвішчы астатніх вызваленых. Паводле інфармацыі «Вясны», частка палітвязьняў выйшлі паводле памілаваньня, а не па амністыі.