Яго будзе ладзіць беларуская ініцыятыва By Teatr. Пра тое, каму і чаму будуць карысныя заняткі, а таксама якая будучыня чакае праект, «Радыё Рацыя» апавёў актор і рэжысёр тэатра Андрэй Новік.
РР: Вы запускаеце тэатральны курс. Чаму?
— Першае, мы разумелі, што на гэта ёсць запыт. Людзі нам і так пісалі, пыталіся пра заняткі. Таму мы пастанавілі гэта зрабіць, бо бачым патрэбу. І гэта не толькі беларусы, але і ўкраінцы. Пры тым, што існуюць украінскія культурныя прасторы, дзе таксама праводзяць такія заняткі, чамусьці пішуць менавіта нам. Гэта вельмі ўражвае.
Другое, каб фонд існаваў, нам трэба аплачваць бухгалтэрыю, іншыя выдаткі. Пакуль у нас няма грантаў і даходаў ад спектакляў, таму даводзіцца шукаць спосабы для фінансавай падтрымкі.
РР: Якую галоўную мэту вы бачыце ў гэтым курсе? Вы хочаце, каб навучэнцы аднойчы выйшлі на сцэну? Ці гэта хутчэй свайго роду медытацыя, тэрапія ў эміграцыйных умовах?
— Гэта будзе залежаць ад кожнага навучэнца. Але мы хочам стварыць вакол сябе тэатральную супольнасць — людзей-аднадумцаў, якія будуць з намі існаваць і памагаць у рэалізацыі як новых, так і старых праектаў.
Таксама мы плануем стварыць спектакль або эскіз спектакля разам з навучэнцамі, каб паказаць, што можна не толькі прайсці фізічную і творчую размінку, але і дасягнуць канкрэтнага выніку.
РР: Хто выкладае на гэтым курсе?
— Галоўны выкладнік — я. Я буду кіраўніком гэтага курсу. Але наш метад заключаецца ў тым, каб запрашаць розных выкладнікаў па розных тэатральных стылях і кірунках.
Мы ўжо дамовіліся з польскай рэжысёркай, што прыйдзе правесці майстар-клас. Яна была вельмі зацікаўленая і нават прапанавала навучэнцам узяць удзел у перформансе для вулічнага тэатра, што яна арганізуе.
РР: Ці можна яшчэ далучыцца да курсу?
— На дадзены момант дзве групы ўжо сфармаваныя і цалкам укамплектаваныя. Магчыма, з тэхнічных прычын мы зробім дадатковы набор на адзін-два месцы. Але пакуль што афіцыйны набор ужо закрыты.
Што цікава, ахвочых было значна больш, чым мы маглі прыняць — і па колькасці месцаў, і па рэсурсах выкладнікаў. Таму з верасня мы плануем правесці вялікі набор з некалькімі кірункамі.
Цалкам слухайце ў далучаным гукавым файле:
