У Кіеве, у каворкінгу Peremoga была прадстаўлена Стратэгія Украіны ў дачыненні да Беларусі.
Мерапрыемства прайшло пры ўдзеле дэпутатаў Вярхоўнай Рады Украіны Ігара Гузя, Саломіі Баброўскай, Алега Дунды, а таксама прадстаўніка Аб’яднанага пераходнага кабінета па пытаннях абароны і нацыянальнай бяспекі Вадзіма Кабанчука, які агучыў асноўныя тэзісы дакумента, дзе былі ўказаны пытанні санкцый і палітвязняў:
– Беларусь пад кіраўніцтвам Лукашэнкі ёсць крыніцай пастаяннай пагрозы для Украіны, для ўсяго рэгіёну. Беларуская дыяспара ва Украіне не ёсць ворагам Украіны. Украіна мае больш супрацоўнічаць з беларускімі дэмакратычнымі сіламі, якія адкрытыя, гатовыя і чакаюць такой супрацы. Стварыць беларускі інфармацыйны цэнтр у Кіеве пра Беларусь.
Вадзім Кабанчук таксама пракаментаваў адзін з ключавых тэзісаў Стратэгіі, які тычыцца прызнання Беларусі акупаванай Расеяй тэрыторыяй:
– Калі мы краіна суагрэсар, то мы нясём поўную адказнасць разам з Расейскай Федэрацыяй, і гэта можа мець розныя негатыўныя наступствы, уключаючы рэпарацыі. Калі мы прымаем, што Беларусь з’яўляецца акупаванай краінай, безумоўна, мы тады можам рыхтаваць адпаведныя інстытуцыі, інструменты для аднаўлення канстытуцыйнага ладу, суверэнітэту, незалежнасці Беларусі.
Таксама на сустрэчы прысутнічаў экс-амбасадар па асаблівых даручэннях па Беларусі МЗС Украіны Ігар Кізім. Ён пацвердзіў, што агучаныя тэзісы Стратэгіі ўжо знаходзяцца на разглядзе вышэйшага кіраўніцтва Украіны і, верагодна, будуць улічаныя пры распрацоўцы далейшых знешненепалітычных рашэнняў.
Цалкам матэрыял слухайце ў далучаным файле:
racyja.com,
фота з архіву Вадзіма Кабанчука
