З 3 па 6 сакавіка беларуская лідарка наведае чатыры італьянскія гарады. Падчас працоўнага візіту Святлана Ціханоўская правядзе шэраг сустрэчаў на вышэйшым узроўні.
Таксама Ціханоўская выступіць з прамовай на другой сустрэчы Альянсу «За дэмакратычную Беларусь». Да гэтага івэнту далучацца прадстаўнікі 20 парламентаў з розных краінаў, беларускія эксперты і праваабаронцы, а таксама чальцы Каардынацыйнай рады, беларускіх палітычных партыяў і народных амбасадаў. Першая такая сустрэча прайшла ў Германіі ў 2023 годзе.
Акрамя таго, лідарка абмяркуе з мэрамі Фларэнцыі, Мілана і Балонні магчымасць вылучэння памяшкання для беларускага шэлтара, а ў Мілане наведае адкрыццё выставы, прысвечанай беларускім палітвязням.
Галоўныя пытанні, якія Святлана Ціханоўская актуалізуе на сустрэчах:
спосабы вызвалення беларускіх палітвязняў; візавая падтрымкі і захаванне мабільнасці беларусаў; легалізацыя беларусаў у Італіі; прыцягненне да адказнасці памагатых рэжыму за злачынствы супраць правоў чалавека і ўдзел у ваенных дзеяннях ва Украіне; умацаванне супрацоўніцтва Італіі з дэмакратычнымі сіламі Беларусі.
