Тэатр оперы і балета Беларусі ініцыюе падрыхтоўку нацыянальнай оперы пра Полацк – як крыніцу беларускай дзяржаўнасці, паведаміла генеральная дырэктарка Вялікага тэатра Кацярына Дулава. Паралельна ў тэатры думаюць пра нацыянальны балет, прысвечаным Марку Шагалу.
«Я думаю, мы паступова падыходзім да таго, каб сфармаваць твор, роўны не эпасу, а нейкаму гістарычнаму летапісу пад умоўнай назвай «Полацкія пісьмёны», — расказала Кацярына Дулава. Музыкальнага матэрыялу дастаткова, — раскрыла дэталі дырэктарка тэатру, – тая ж сімфонія «Полацкія пісьмёны» Андрэя Мдзівані (Шостая сімфонія Андрэя Мдзівані «Полацкія пісьмёны» апавядае пра Еўфрасінню Полацкую і Францыска Скарыну).
Дулава мяркуе, што павінна быць сучаснае пераасэнсаванне тых падзей. Таму адной з прапаноў можа быць рэспубліканскі «конкурс на напісанне сцэнарыя да такога палатна, якое стала б прэзентацыйным не толькі ў нашай краіне, а мы маглі б яго прастаўляць яго на розных сцэнах свету».
Раней карэспандэнт «Независимой газеты» спытаў дэрэктарку Вялікага тэатра оперы і балета Кацярыну Дулаву, чаму ў рэпертуары прадстаўлены ўсяго дзве нацыянальныя оперы. Дулава патлумачыла, што беларускі балет сапраўды прадстаўлены багацей, але тут і выбар большы: беларускія кампазітары часцей звярталіся да гэтага жанру. Многія оперы савецкага часу сёння ўжо крыху састарэлі; для таго каб яны былі цікавыя сучаснай публіцы, іх трэба грунтоўна перапрацаваць.
Іншы шлях — новыя оперы, у гэтым выпадку трэба аб’яўляць конкурсы на стварэнне новых партытур. Спачатку літаратурных асноў, лібрэта, а потым і кампазітарскі конкурс. «Адзін з кірункаў пошуку сюжэту для нацыянальнай оперы — гісторыя Полацкага княства як калыскі беларускай дзяржаўнасці», — сказала тады Кацярына Дулава.
У афішы Вялікага тэатра оперы і балета Беларусі замежных і рускіх прэм’ер прыкладна па палове, аднак на вядучыя ролі ўсё больш запрашаецца адмыслоўцаў з Расіі — на месца звольненых беларусаў.
Нагадаем, што ў снежні 2023 года Кацярына Дулава была ўзнагароджана медалём Пушкіна «за вялікі ўклад у збліжэнне і ўзаемаўзбагачэнне культур народаў Расіі і Беларусі». А напрыканцы лютага 2025-га ўказам Аляксандра Лукашэнкі заслугі генеральнага дырэктара Нацыянальнага акадэмічнага Вялікага тэатра оперы і балета Кацярыны Дулавай былі адзначаны медалём Францыска Скарыны. Пад кіраўніцтвам Дулавай ў Вялікім тэатры кадрывыя пытанні, якія ўзніклі ў выніку палітычных рэпрэсій, закрываюцца за лік запрошаных адмыслоўцаў з Расіі.
