11 красавіка 2025 года ў Празе, на базе ўніверсітэта CEVRO, адбыўся Круглы стол пад назвай «Будучыня Беларусі – еўрапейская: выбар на карысць каштоўнасцяў, а не страху». Мерапрыемства аб’яднала прадстаўнікоў дэмакратычных сілаў Беларусі, чэшскіх палітыкаў і прадстаўнікоў акадэмічнай супольнасці, дыпламатаў, экспертаў у сферы бяспекі і аналітыкаў.
Арганізатарамі дыскусіі выступілі Офіс дэмакратычных сілаў Беларусі ў Чэшскай Рэспубліцы на чале з дырэктаркай Крысцінай Шыянок і Prague Center for Transatlantic Relations (PCTR) пры падтрымцы Міністэрства замежных справаў Чэхіі.
Праграма круглага стала ўключала тры тэматычныя панэлі:
- Панэль па абароне, прысвечаную ролі дэмакратычнай Беларусі ў еўрапейскай сістэме бяспекі і падтрымцы Украіны ва ўмовах расійскай агрэсіі;
- Аналітычную, якая закранала пытанні еўрапейскай ідэнтычнасці беларускага грамадства і гістарычныя сувязі Беларусі з Еўропай;
- Палітычную, у межах якой абмяркоўваліся перспектывы інтэграцыі Беларусі ў еўрапейскую палітычную прастору, уключаючы супрацоўніцтва з Радай Еўропы і ініцыятыву па стварэнні Кансультатыўнай групы паміж Еўрапейскім Саюзам і беларускімі дэмакратычнымі сіламі.
Сярод ключавых спікераў на мерапрыемстве былі:
- Ян Мар’ян – намеснік міністра замежных справаў Чэхіі;
- Павел Фішэр – сенатар Парламента Чэшскай Рэспублікі, старшыня Камісіі Сената па замежных справах, абароне і бяспецы;
- Томаш Копэчны – упаўнаважаны ўрада Чэхіі па рэканструкцыі Украіны;
- Давід Стулік – спецпрадстаўнік Чэхіі па Усходнім партнёрстве;
- Вадзім Кабанчук – прадстаўнік па абароне і нацыянальнай бяспецы Аб’яднанага пераходнага кабінета Беларусі;
- Дзяніс Кучынскі – дарадца нацыянальнай лідаркі Беларусі Святланы Ціханоўскай па пытаннях дыпламатыі;
- Аляксандр Мілінкевіч – канцлер Вольнага Беларускага Універсітэта.
Мадэратарамі дыскусіі выступалі:
- Мацей Ручай – былы польскі дыпламат і старшы аналітык у Prague Center for Transatlantic Relations (PCTR), які спецыялізуецца на пытаннях еўрапейскай інтэграцыі і трансатлантычных адносінаў.
- Габрыэла Свароўска – чэшская экспертка ў галіне знешняй палітыкі і бяспекі, якая мае значны досвед у аналізе міжнародных адносінаў і палітычных працэсаў у Цэнтральнай і Усходняй Еўропе.
- Павел Гаўлічэк – даследчык у Association for International Affairs (AMO), вядомы сваімі даследаваннямі ў галіне міжнароднай палітыкі і дэмакратычных трансфармацый у постсавецкіх краінах.
Дырэктарка Офіса беларускіх дэмакратычных сілаў у Чэшскай Рэспубліцы Крысціны Шыянок:
«Для нас, беларусаў, Еўропа – гэта адзіная альтэрнатыва так званаму «рускаму міру». Толькі ў Еўропе могуць захоўвацца нашая незалежнасць, нашая ідэнтычнасць і нашая культура».
