Украінцы з вялікім адрывам займаюць першае месца па колькасці сярод замежнікаў у Польшчы, але ёсць адно выключэнне.
Які рэгіён самы беларускі
Па стане на пачатак 2026 года ў Польшчы жывуць 140 974 грамадзяне Беларусі з дазволамі на жыхарства ўсіх тыпаў, а ўкраінцаў — 543 599 чалавек.
Больш за траціну беларусаў у Польшчы жыве ў Варшаве — 53 220 чалавек. На другім месцы ідзе Падляшша. У Беластоку і Падляшскім ваяводстве жыве 13 470 грамадзян Беларусі з дзейным ДНЖ.
Бадай, галоўная адметнасць Падляшша заключаецца яшчэ і ў тым, што гэта адзіны рэгіён у Польшчы, дзе на першым месцы па колькасці замежнікаў знаходзяцца не ўкраінцы, а беларусы.
І калі агулам украінцаў па ўсёй Польшчы ў 3,85 разу больш, чым беларусаў, то на Падляшшы беларусаў у 3,22 разу больш, чым украінцаў.
То-бок на Беласточчыне жывуць усяго 4 183 грамадзяне Украіны супраць 13 470 грамадзян Беларусі.
Адначасова Падляшша з’яўляецца рэгіёнам, дзе жыве найбольшы працэнт грамадзян Польшчы, якія з’яўляюцца беларусамі па нацыянальнасці.
Дзе яшчэ жыве шмат беларусаў?
Апроч Варшавы і Беласточчыны, шмат беларусаў з дзейнымі ДНЖ жывуць у:
- Ніжнесілезскім ваяводстве (Уроцлаў) — 12 314 чалавек;
- Велікапольскім ваяводстве (Познань) — 11 280 чалавек;
- Паморскім ваяводстве (Гданьск) — 11 272 чалавекі.
