Пра адмову ад правядзення спаборніцтваў пад эгідай Міжнароднай федэрацыі водных відаў спорту (World Aquatics) абвясціла федэрацыя плавання Нарвегіі. Краіна не прыняла допуску беларускіх і расейскіх спартоўцаў да ўдзелу са сцягам і гімнам.
«Нашая пазіцыя зразумелая. Мы не будзем праводзіць ніякіх чэмпіянатаў, пакуль расейскія і беларускія спартоўцы, як дарослыя, так і юніёры, будуць мець поўны доступ, права ўдзелу і змогуць выкарыстоўваць свае сцягі і нацыянальныя гімны», – заявіў прэзідэнт Нарвежскай федэрацыі плавання Ката Братбак, перадае Reuters.
На пачатку красавіка World Aquatics заявіла, што дапусціць да ўдзелу прадстаўнікоў Беларусі і Расеі.
Раней супраць такой пазіцыі міжнароднай арганізацыі ўжо выступіла Польшча. Мясцовая федэрацыя плавання заявіла, што не дапусціць беларускіх і расейскіх удзельнікаў да чэмпіянату Еўропы па скачках у ваду, які прыме ў сябе ў 2027 годзе. Пры гэтым краіна не плануе байкатаваць міжнародныя турніры цалкам, каб не нашкодзіць уласным спартоўцам.
Доступ на міжнародныя спартыўныя мерапрыемствы грамадзянам Расеі і Беларусі быў забаронены пасля пачатку поўнамаштабнай вайны ва Украіне ў лютым 2022 года. З 2023 года яны ўдзельнічалі ў спаборніцтвах індывідуальна і ў нейтральным статусе.
Ужо на зімовых Алімпійскіх гульнях у Картыне-д’Ампэцца 2026 года спартоўцы з абедзвюх краінаў выступалі пад дзяржаўнымі сцягамі.
