Падчас крызісу ў Пэрсідзкай затоцы рэпатрыянт зь Беларусі Раман Гофман прынёс прысягу і афіцыйна стаў новым дырэктарам ізраільскай выведкі.
Раман Гофман нарадзіўся ў Мазыры. У 1990 годзе, ва ўзросьце 14 гадоў, ён разам з сям’ёй рэпатрыяваўся ў Ізраіль. Там ён пачаў вайсковую карʼеру ў бранятанкавых войсках і даслужыўся да званьня генэрал-маёра.
Да прызначэньня ў «Масад» Гофман займаў пасаду вайсковага сакратара прэмʼер-міністра Ізраіля Біньяміна Нетаньягу, быў яго дарадцам па бясьпецы.
Цырымонія ўступленьня на пасаду адбылася 2 чэрвеня ў Ерусаліме, піша The Times of Israel. Выступаючы на ёй, Нетаньягу назваў адной з галоўных задач новага кіраўніка выведкі супрацьдзеяньне Ірану і яго ядзернай праграме. Нетаньягу абвясьціў аб яго вылучэньні яшчэ ў сьнежні 2025 года.
Таксама прэмʼер Ізраілю падкрэсьліў, што «беларуская зямля дала Ізраілю цэлую плеяду лідэраў».
Гофман — 14-ы дырэктар «Масаду», які замяняе сыходзячага кіраўніка Дэвіда Барня.
Што сказаў Гофман пра апэрацыю ЗША і Ізраіля супраць Ірану
У сваім выступе Гофман таксама зьвярнуўся да тэмы Ірану і апэрацый, якія Ізраіль распачаў супраць Ісламскай Рэспублікі і саюзных ёй проксі-фармаваньняў у апошнія гады, апошняй з якіх быў наступ, распачаты сумесна з ЗША 28 лютага, які ў цяперашні час знаходзіцца ў хісткім статусе спыненьня агню, і паабяцаў, што праца Ізраіля ў гэтай сфэры яшчэ не завершаная.
«Стратэгічны паварот, які мы ажыцьцявілі супраць іранскай восі» праз ваенныя дзеяньні Ізраіля супраць Тэгерана і яго пасярэднікаў, «зьмяніў балянс сіл ва ўсім рэгіёне», — сказаў ён. «Але задача яшчэ не завершана. Сэрца Масада ляжыць у сакрэтных апэрацыях супраць яго мэтаў. Мы будзем абараняць гэтую місію любой цаной».
Афіцыйныя беларускія ўлады, таксама як і расейскія, застаюцца саюзьнікамі Ірану.
