Пра стварэнне новай ініцыятывы паведаміў кіраўнік праекта «Беларускія Магістраты» Цімох Акудовіч на сваёй старонцы ў Фэйсбук.
«Так склалася, што запускаем яшчэ адзін Магістрат — МедыяМагістрат.
На дадзены момант асноўная мэта — развіццё беларускамоўнай блогасферы на YouTube. <…>
YouTube — гэта сучаснае тэлебачанне, а беларускамоўны кантэнт там па-ранейшаму прадстаўлены ў даволі малой колькасці ніш.
Механіка застаецца класічнай: збіраем кола ахвочых, гатовых штомесяц выдаткоўваць ад 10 да 100 еўра ў агульную скарбонку. Раз на 2–3 месяцы праводзім конкурс праектаў і супольна вырашаем, куды пойдуць сабраныя грошы.
Нашыя прынцыпы застаюцца нязменнымі:
- Гульня ўдоўгую. Мы ствараем супольнасць павольна, але на доўгі час — каб разам выпрацоўваць эфектыўную стратэгію інвеставання ў беларускія праекты.
- Прамая дэмакратыя. Усе рашэнні прымаем супольна — праз дамоўленасці або галасаванне.
- Разумныя інвестыцыі. Шукаем праекты, якія дзякуючы нашай дапамозе могуць стаць самадастатковымі і ўстойлівымі», — напісаў Цімох Акудовіч.
Пакуль што далучыцца да Магістрата можна толькі праз яго ўдзельнікаў. Каб далучыцца ці падтрымаць новую ініцыятыву, трэба пісаць наўпрост Цімоху Акудовічу.
