Матэвуш Асташэвіч з бельскіх беларусаў пачне вучыцца ў вядомым ангельскім каледжы. Такога ніколі не было ў гісторыі Другога ліцэя з беларускай мовай навучання ім. Браніслава Тарашкевіча ў Бельску-Падляшскім, паведамляе bielsk.eu.
Старшакласнік з маленькага горада, атрымаў стыпендыю ў знакамітым элітным лонданскім Dulwich College. Такія цуды здараюцца! Зрабіў гэта Матэвуш Асташэвіч, вучань другога, фактычна трэцяга, класа Другога ліцэя з беларускай мовай навучання ім. Браніслава Тарашкевіча ў Бельску-Падляшскім. У панядзелак, 4 верасня, у Лондане пачнецца навучальны год.
Матэвуш Асташэвіч пасля заканчэння першага класа стаў стыпендыятам Нацыянальнага дзіцячага фонду. Атрымліваў стыпендыю за выдатныя дасягненні ў навуцы. За два гады стаў лаўрэатам і фіналістам шматлікіх алімпіяд і прадметных конкурсаў.
1 верасня Матэвуш ад’язджае ў новае месца навучання, а перад ад’ездам, нягледзячы на канікулы, трэба было зрабіць урокі, якія задала новая школа. Урок заключаўся ў рэцэнзаванні выбранай кнігі.
