Тэатральны крытык Аляксандр Коэн на партале broadwayworld.com зрабіў свой топ лепшых спектакляў Вялікабрытаніі за 2022 год.
Аляксандр Коэн вылучыў пяць намінацый:
- Лепшы спектакль для вялікай сцэны
Dogs of Europe — Barbican Theatre
- Лепшы спектакль для малой сцэны
Favour — Bush Theatre
- Лепшы оперны спектакль
Last Days — Royal Opera House, Linbury Studio
- Лепшы спектакль свабоднай пляцоўкі
We Were Promised Honey — Summerhall, Edinburgh Fringe
- Найгоршы спектакль
Jews. In their Own Words
Кожны свой выбар крытык разгорнута патлумачыў. Вось як ён ахарактарызаваў спектакль «Сабакі Еўропы»:
«Было вельмі жудасна назіраць, як прарочае бачанне расколатай Еўропы ад Беларускага Свабоднага тэатра ажывае ў сакавіку ўсяго праз некалькі дзён пасля ўварвання Пуціна ва Украіну. «Сабакі Еўропы» сваімі голымі акрываўленымі рукамі выразалі нутраную какафонію гартанных вобразаў, музыкі і паэзіі. Гаворка ішла не столькі пра гісторыю, якую ён расказваў, колькі пра нігілістычны свет, які яго акружаў: антыўтопія, якая прытулілася зусім блізка на гарызонце.
Праца Беларускага Свабоднага тэатра ўражвае. Андэграўндны тэатральны калектыў у выгнанні з роднай Беларусі, яны з’яўляюцца сапраўдным сведчаннем неабходнасці тэатра і мастацтва не толькі для таго, каб казаць праўду ўладзе, але і для таго, каб прымусіць нас, як гледачоў, глядзець у вочы рэчаіснасці ва ўсёй яе суровай змрочнасці».
Заснаваны на рамане Альгерда Бахарэвіча, спектакль «Сабакі Еўропы» — гэта фэнтэзі-палітычны трылер пра небяспеку адвесці позірк, калі ўкараняецца аўтарытарызм.
