У Парыжы 20 кастрычніка пройдзе аўкцыён па продажы карцін мастакоў «Парыжскай школы». Гэта знакамітыя геніі імпрэсіянізму і мадэрну — Мадзільяні, Магрыт, Маціс, Рэнуар, Пікасо, Далі, а таксама ўраджэнцы Беларусі — Марк Шагал і Хаім Суцін. Сярод мноства мастацкіх лотаў ёсць і іх работы.
На таргах выстаўленыя 3 карціны нашых землякоў. Палатно Хаіма Суціна пад назвай «Сельскі пейзаж у Серэ» спецыялісты ацанілі як мінімум у 600-800 тысяч еўра. І гэта толькі пачатковы кошт, які падчас аўкцыёну можа значна вырасці.
Акрамя таго, на таргі выставілі дзве работы ўраджэнца Віцебска Марка Шагала. Гэта «Кветкі, грушы і вінаград» і «Два букеты».
«Два букеты» Марка Шагала ацанілі ў 200-300 тысяч еўра, другое палатно — у 220-350 тысяч еўра.
«Шагал і Суцін нагадваюць нам пра час, калі Парыж быў цэнтрам свету», — пішуць у анонсе аўкцыёна дома Sotheby’s.
У Беларусі карціны мастакоў «Парыжскай школы» захоўваюцца ў галерэі «Арт Беларусь». Адзін з самых каштоўных і вядомых артэфактаў калекцыі — «Ева» Хаіма Суціна. Знакамітае палатно, якое стала адным з сімвалаў падзей 2020 года, ацэньваецца ў 2 мільёны еўра.
