Дакументальная карціна «Святая вада» (Woda święcona) беларускага рэжысёра Андрэя Куцілы ўганаравана прызам глядацкіх сімпатый на Фестывалі медыя «Чалавек у небяспецы» (Festiwal Mediów Człowiek w Zagrożeniu) у Лодзі.
Кароткаметражная стужка ўдзельнічала ў конкурсе тэлевізійных рэпартажаў і гэтаксама была адзначана прызам «Манаполіс» за найлепшы тэлерэпартаж.
Стужка была створана пры ўдзеле канала «Белсат». Канал абяцае, што праз пэўны час кіно з’явіцца на Ютуб-канале «Белсат.DOC».
«У адным з раёнаў Кіева ў чарговы раз адзначаюць свята Хрышчэння Гасподняга. Для гэтага ў суседнім возеры была высечана палонка. На беразе чуваць, як звоняць царкоўныя званы. Людзі распранаюцца і стаяць у чарзе. Да нападу Расеі на Украіну засталося 36 дзён. Буйныя планы людзей рознага ўзросту, галерэя аголеных цел і кароткія дыялогі расказваюць пра крохкасць жыцця, супярэчлівасць чалавечай веры і радасць стойкасці», – так гучыць анатацыя да фільма Андрэя Куцілы.
Варта адзначыць, што беларускі рэжысёр таксама працаваў на фестывалі ў складзе журы конкурсу дакументальнага кіно.
«Праграма была вельмі моцнай! – падзяліўся кінематаграфіст. – Гран-пры конкурсу дасталося стужцы «Апалонія, Апалонія» Леа Глоб», – дадаў ён.
Festiwal Mediów Człowiek w Zagrożeniu ў Лодзі ладзіўся з 16 па 22 кастрычніка.
