Госцем ваяводы Яцэка Бжазоўскага быў Павел Латушка, былы амбасадар, намеснік старшыні Аб’яднанага пераходнага кабінету. На сустрэчы таксама прысутнічалі прадстаўнікі падляшскіх беларускіх суполак і беларускай дыяспары.
Павел Латушка зазначыў, што беларусы ўспрымаюць Польшчу як найважнейшага партнёра і прыклад для пераймання: — Польшча 1980-х гадоў, рух Салідарнасці — гэта тэмы, пра якія беларусы вельмі часта гавораць. Тут мы маем шанец захаваць сваю мову, сваю культуру і тоеснасць, якія стануць крыніцай аднаўлення Беларусі ў будучыні.
Пры гэтым ён звярнуў увагу на важнасць Падляшскага ваяводства, дзе жывуць як уцекачы з лукашэнкаўскай Беларусі, так і беларуская меншасць. Ён выказаў радасць, што на ўрадавым роўні ствараюцца пляцоўкі для дыялогу па найважнейшых праблемах гэтай супольнасці ў Польшчы. Гэта група, створаная супольна беларускім Аб’яднаным пераходным кабінетам і Міністэрствам унутраных спраў і адміністрацыі Польшчы, а таксама рабочая група пры Міністэрстве нацыянальнай адукацыі.
Падляшскі ваявода Яцэк Бжазоўскі заявіў пра дапамогу ў вырашэнні тых праблем, якія можна вырашыць на мясцовым роўні.
— Я ўжо размаўляў з падляшскім начальнікам адукацыі наконт беларускіх школ і магу вас запэўніць, што мы зробім усё магчымае, каб яны не зачыняліся.
Ваявода запэўніў, што для такіх спраў прызначаны ваяводскі ўпаўнаважаны па справах меншасцяў. Задачай будзе дыягнаставаць найважнейшыя праблемы, якія стаяць перад беларусамі, якія жывуць у ваяводстве, а таксама арганізоўваць сустрэчы, на якіх гэтыя пытанні будуць абмяркоўвацца.
racyja.com паводле www.gov.pl
