18 ліпеня 2023 г. рашэннем Сената ЕГУ выкладчыку Аляксандру Калбаске прысвоена званне «прафесар-эмерытус ЕГУ». Праф. Аляксандр Калбаска ўдастоены ганаровага звання за заслугі перад ЕГУ і грамадзянскай супольнасцю ў галіне адукацыі, навукі і культурна-асветніцкай дзейнасці.
«Праф. Калбаска ўзнагароджаны медалём «За працоўную доблесць», знакам ЕГУ “Honorus” (2007). У 2017 г. яму было прысвоена ганаровае званне ЕГУ “Lauditio Magnum” за выдатны ўклад у развіццё ліберальнай адукацыі. Праф. Калбаска стварыў у ЕГУ школу музеязнаўства, займаў пасады намесніка дэкана, дэкана факультэта, а з 2012 г. па 2020 г. быў прарэктарам Еўрапейскага гуманітарнага ўніверсітэта. Неаднаразова атрымліваў прэстыжныя стыпендыі і гранты, у тым ліку стыпендыю Фулбрайта.
Аляксандр Калбаска ўнёс вялікі асабісты ўклад у развіццё ЕГУ як універсітэта, які працуе ў адпаведнасці з еўрапейскімі і сусветнымі стандартамі адукацыі. Ён актыўна ўкараняе ва ўласную практыку новыя формы актыўнага навучання. Выкладаючы на трох мовах (беларускай, англійскай і рускай), творча падыходзіць да выбару метадаў і прыёмаў работы і ацэньвання вынікаў актыўнасцей студэнтаў. Аляксандрам Калбаскам быў распрацаваны шэраг курсаў для бакалаўрыяту і магістратуры, якія з’яўляюцца важнай часткай праграм ЕГУ. У прыватнасці, у рамках праграмы OSUN А. Калбаска, сумесна з праф. Джэрэмі Адэльманам (Універсітэт Прынстана, ЗША), чытае курс «Сусветная гісторыя з 1300 г.» – гаворыцца ў заключэнні Сенацкай камісіі.
Акадэмічная супольнасць Еўрапейскага гуманітарнага ўніверсітэта сардэчна віншуе прафесара Аляксандра Калбаску з заслужанай узнагародай, якая адлюстроўвае яго выдатныя даследчыя і педагагічныя дасягненні, адданасць працы і прыхільнасць высокім стандартам адукацыі і навуковай думкі.
Жадаем прафесару Аляксандру Калбаске невычэрпнага натхнення і поспехаў! Спадзяемся, што яго досвед і мудрасць працягнуць натхняць цяперашняе і будучыя пакаленні студэнтаў, выкладчыкаў і калег.
